Пераможцы «Басоў», ULIS, N.R.M., дэбютны альбом «Сонцавакол» ад Indra, «Океан Ельзи», «Рок-Кола», Tav.Mauzer – гэта не анонс новай складанкі, а канкрэтныя канцэрты, якія прайшлі ў мінулым годзе ў Полацку.
Кідаючы погляд на падзеі музычнага жыцьця, я магу сьмела зрабіць выснову, што Полацак можа ганарыцца ня толькі слаўным гістарычным мінулым.
Так, у большасьці канцэртаў, якія ладзіліся ў Полацку-Наваполацку мінулым годам, бралі ўдзел збольшага мясцовыя калектывы ці гурты, якія называюць «другім эшалонам». Аднак пра узровень мясцовых гуртоў яскрава сьведчаць вынікі «Басовішча» і The Global Battle of the Bands. «Скімен» у Global Battle дайшоў да паўфіналу, а «Фляўс і Кляйн» – да фіналу, і ў дадатак перамог на «Басовішчы».
Музычны год пачаўся з таго, што полацкая Indra як пераможца «Зваротнага адліку-2006» на «Эўрапейскім Радыё для Беларусі» паехала ў Беласток для запісу свайго дэбютнага альбома. Альбом «Сонцавакол» за цяжкі працоўны тыдзень быў запісаны на студыі Rembrandt, там, дзе пішуцца пераможцы «Басовішча». У склад альбома ўвайшлі песьні Паўла Сьляпцова, Натальлі Клімавай і Леры Сом.
З прэзэнтацыі альбома Indra зрабіла цэлы канцэрт беларускамоўнага року пад назвай «Ноч Ваўкалака». У ім прымалі ўдзел мясцовыя The Planets і PiP, менчукі Recha. Хэдлайнэрам зьяўляўся ULIS, які дарэчы, амаль тры гады перад тым не выступаў на беларускіх пляцоўках. «Ноч Ваўкалака» прайшла настолькі файна, што арганізатары плянуюць зрабіць падобны канцэрт і ў наступным годзе.
Другой значнай падзеяй была прэзэнтацыя альбома N.R.M. - «06», што адбылася амаль на паўгады раней за менскую (28 траўня). Як заўжды, музыкі былі на вышыні, сьпявалі і свае старыя гіты, і песьні з новага альбома. Песьням «Менск-Мінск» і «Гадзючнік» падпявала большая частка залі, бо ўжо ведала іх па складанцы «Песьні Свабоды-3» і гіт-параду «Тузіна Гітоў».
Верасень і навучальны год быў распачаты канцэртам «Океана Ельзи» і J:мoрс – дзякуй Velcom! Жудасна халоднае надвор'е не сапсавала сьвята.
Гаворачы пра самыя буйныя падзеі году, нельга абмінуць 17-ты фэстываль «Рок-Кола». У гэтым годзе тут бралі ўдзел гурты ня толькі зь Беларусі, але і расейцы, што выступалі і як госьці фэсту, і як канкурсанты. Два дня Полацак жыў музыкай. Мяркуючы па колькасьці гледачоў у самай вялікай залі гораду, рок-н-рол тут вельмі запатрабаваны. Так што дарагія «зоркі» – прыязджайце, будзем вельмі радыя.
Вось і ўсё на гэтым. А да Новага году ўсіх аматараў беларускага року чакае яшчэ адзін падарунак – канцэрт Tav.Mauzer 28 сьнежня ў клюбе «Плястылін».
Міцяй, для ТГ
Вэрсія для друку
|
