Віцебскі гурт увёз з Полацку дзьве ўзнагароды — прыз за лепшае шоў ды ўласна Гран-пры фэсту. Канкурэнцыю гурту Ірыны Фёдаравай хіба склаў гурт ESPRIT, іншых прэтэндэнтаў на асноўныя ўзнагароды не было і блізка — з заяўленых у конкурсе дзесяці гуртоў да полацкага палаца культуры дабраліся толькі пяць. На фэст LIVEinROCK даехала толькі палова канкурсантаў. У выніку за перамогу ў чатырох намінацыях змагаліся пяць гуртоў. З усіх выступоўцаў вылучаліся дзьве каманды з жаночым вакалам — Jenowa і ESPRIT, якія і ўзялі галоўныя прызы фэсту. Віцебская каманда атрымала перамогу ў намінацыі «Лепшае шоў» ды ўласна Гран-пры, а менчукі былі адзначаныя за тэкст году. Суцяшальны прыз дастаў мясцовы фольк-мэтал гурт «Коло Прави».
Гурт Jenowa існуе тры гады, пакуль яны маюць толькі сынгл і кліп, цяпер працуюць над максы-сынглам пад назвай «Жывыя». Яны ўдзельнічалі ў расейскім фэсьце «Воздух» у 2006 годзе, былі фіналістамі беларуска-швэдзкага праекту Bandsсan, а таксама прызнаваліся найлепшай альтэрнатыўнай камандай на віцебскім No Logo Fest.
