Дзень народзінаў «безназоўных» :: Mузычная прастора Беларусі

Навіны
Афіша
Акорды
Mp3
Кліпы
Урокі
Студыі гуказапісу

23.11.2009 - Дзень народзінаў «безназоўных»
http://music.fromby.net/

Беларуская рок-грамада павіншавала гурт :B:N:, які справіў у Менску 10 гадоў сваёй дзейнасьці. Іх калегам з IQ48 не зашкодзіў прысьці на канцэрт нават «ласіны грып», на які захварэлі ўсе ўдзельнікі каманды. Яшчэ адзін госьць — Vinsent даводзіў неабходнасьць аб’яднацца разам беларускім рэпэрам і рокерам, а Алег Хаменка запрасіў лідэра :B:N: у сваю «новую канюшню». Падрабязнасьці пра сьвяткаваньне дня народзінаў :B:N: на ТГ.
:B:N:

Ахвочых павіншаваць у гэты вечар бярозаўскіх музыкаў было нямала. Першымі даніну павагі сваім землякам аддалі Kalmary, дзе лідэр :B:N: Алесь Лютыч часьцяком «падпрацоўвае» ў якасьці бубнача. Вядома ж, у R-Club завіталі і IQ48. Як зазначылі «здаровыя лосі» ў гэты дзень здароўем пахваліцца яны не маглі — усе як адзін захварэлі на «ласіны грып», але не прыйсьці не маглі.

Уласна юбіляры адыгралі вялікі сэт і прэзэнтавалі ў тым ліку і дзьве новыя песьні «Будзь сабою» і «Жыцьцё маё», прасьпявалі зь Яўгеніяй Хіло адзін з галоўных гітоў — «Дажджамі», зьдзівілі нечаканым дуэтам зь Vinsent'ам. У іх трэку вялося пра неабходнасьць аб’яднанньня беларускага року і рэпу. Лютыч таксама сьпяваў з Кульлінковічам пра «Гузік» і з Хаменкам пра «Канюшню». Лютыч у сваю чаргу паважаным гасьцям прысьвяціў песьню «Ружа».

Пасьля свайго выступу Алесь Лютыч выглядаў вельмі задаволеным: «Адчуваю нейкую пустэчу ўнутры, але яна ўтварылася толькі таму, што аддаў усё напоўніцу сёньня». Лідэр :B:N: зазначыў, што верыць у будучыню беларускай незалежнай музыкі і гатовы зрабіць у яе свой унёсак. І вядома ж, бярозаўскія музыкі пэўныя ў тым, што адзначаць і 20 гадоў сваёй дзейнасьці. Як мінімум.

Аляксандар Лукашоў, для ТГ

Фота: Marcin Polec

Вэрсія для друку