Хіп-хоп у цырку, альбо мары Krou’а :: Mузычная прастора Беларусі

Навіны
Афіша
Акорды
Mp3
Кліпы
Урокі
Студыі гуказапісу

11.12.2006 - Хіп-хоп у цырку, альбо мары Krou’а
http://music.fromby.net/

“Тое, што робіцца модным у Расеі, хутка робіцца папулярным і ў Беларусі. Розьніца ў тым, што расейцы могуць зрабіць больш-менш якасны прадукт, а беларускія музыкі капіююць мала таго, што амэрыканцаў, а яшчэ й расейцаў. Гэта датычыцца ня толькі хіп-хоп’а,
Krou. Чырвоным па Белым

Яшчэ год-два таму, я б ніколі не падумаў, што так хутка пачнецца ўздым хіп-хоп культуры ў Беларусі. Зацікаўленасьць журналістаў, праграмы па тэлевізіі, усё больш гітоў на радыё, модныя імпрэзы ў клюбах, сьведчаць аб тым, што – пачалося!

Чакалі мы на гэты момант багата часу. Пакуль дачакаліся, беларускі хіп-хоп пасьпеў ужо некалькі раз “памерці”, як пісалі на форумах і чыталі ў сваіх трэках некаторыя рэп-выканаўцы. Самае сьмешнае, што нейкая праўда ў гэтым была. Людзі, якія тады пачыналі варушыць нашае асяродзьдзе, між іншым Фрэйд, Алаб і шмат іншых, пасталелі, скончылі вучобу. Трэба было шукаць працу, бо з музыкі пражыць было немагчыма. Працуючы, ужо ня мелі вольнага часу на канцэрты, на сустрэчы, на напісаньне новых тэкстаў, інструмэнталаў. Можа час бы і знайшоўся, але самая вялікая праблема была ў тым, што яны ня бачылі пэрспэктыў, а яшчэ далей – сэнсу.

2006 год. Раптам Расею захлынула мода на R’n’B. Дый ня маецца на ўвазе стыль музыкі Rhythm & Blues, а субкультура Rich & Beauty (Багаты й Прыгожы). Толькі да багацьця й прыгажосьці было далёка. Спрабуючы прыпадобіцца да сваіх куміраў моладзь пачала насіць прыгожыя гадзіньнікі Jacob & Co або G-Unit, толькі ў адрозьненьні ад багатых выканаўцаў, якія носяць золата й плаціну, моладзь апранала алюміневыя рэплікі. Як кажуць: якая краіна, такія “багачы”. Так ці інакш, факт застаецца фактам. Камэрцыя залезла ў хіп-хоп і зрабіла сваё. Някепска тое, што камэрцыя. Кепска тое, што разам з модай прыйшло шмат xero-boy’аў, звычайнай калькі, якая намагаецца капіяваць чыйсьці стыль. А можна ж рабіць музыку да клюбаў не падшываючыся пад 50 Cent’a, а па-свойму.

Як вядома, тое, што робіцца модным у Расеі, хутка робіцца папулярным і ў Беларусі. Розьніца ў тым, што расейцы могуць зрабіць больш-менш якасны прадукт, а беларускія музыкі, хоць і цяжка іх так назваць, капіююць мала таго, што амэрыканцаў, а яшчэ й расейцаў. Гэта датычыцца ня толькі хіп-хоп’а, “глямурнага” R’n’B, а таксама папсы й часам нават рока. А можам мы гэта ўбачыць на прыкладзе галоўнага хэд-лайнера Hip-Hop Фэстывалю „Active Action” – гурта „PiNcode”. Калі я дазнаўся, што адным з удзельнікаў гурта - “адкрыцьця году”, як кажуць арганізатары фэсту, зьяўляецца вядомы ў асяродзьдзі беларускага хіп-хоп’а выканаўца Повар, мне зрабілася блага. Асоба, якая была адным зь піянэраў рэп’а ў Беларусі, якая змагалася за чысьціню музычнага накірунку зрабілася марыянэткай. Што ж, людзі зьменяюцца й ня нам іх судзіць. Мы можам толькі рэагаваць, што я дарэчы і раблю.

Зараз пра сам фэстываль. Так як я казаў на самым пачатку артыкула, хіп-хоп’ам пачалі цікавіцца мэдыя, спонсары й арганізатары. Вынікам чаго й ёсьць Hip-Hop Фэстываль „Active Action”, якія адбудзецца 16 сьнежня ў БелДзяржЦырку. Пэўныя асацыяцыі ў сувязі зь мейсцам правядзеньня імпрэзы лезуць у голаву, але паспрабуем без сарказмаў.
Насамрэч, мне гэтая ідэя вельмі спадабалася. Сур’ёзныя арганізатары – музычнае тэлебачаньне й дзяржаўны цырк, спонсар – кампанія па прадукцыі поп-корна «Супер-Пупер», інфармацыйны партнэр – вядомы партал TUT.BY і ня менш вядомае радыё ВА. Адразу бачна, што людзі маюць сур’ёзны падыход і хочуць зрабіць нешта маштабнае й цікавае. Менавіта гэтага не хапала нам раней, каб падштурхнуць хіп-хоп.

Сама думка фэсту вельмі трапная. Хіп-Хоп складаецца з 4 элементаў: DJ’ing, Rap, Brakedance, Graffiti. Арганізатары закранулі амаль усё, не хапіла толькі райтэраў з фарбай. Ёсьць DJ’і, ёсьць біт-боксэры (частка рэп’а), ёсьць і найбольш разьвіты ў Беларусі элемент – танцоры Brakedance’а. Хапае прафэсійных судзьдзяў, асабліва адзначу DJ Хобот’а, легенду расейскага DJing’а. Дадамо элемент battle’a (сланг. спаборніцтва) і атрымаем рэцэпт на ідэальнае мерапрыемства.

Асабіста лічу, што арганізатары й ініцыатары (асабліва MC Kienja) зрабілі добрую справу. Калі іншыя возьмуць зь іх прыклад, мабыць хутка замест папсы людзі пачнуць слухаць рэп і браць удзел у разьвіцьці хіп-хоп’а.
Мары, мары... А можа....?!

P.S. Арганізатарам, наступным разам, раю запрасіць некалькі беларускіх маладых і пэрспэктыўных рэп-гуртоў, каб можна было сказаць – запрашаем на 100% Хіп-Хоп Фэстываль!

Kроў, для “Тузіна Гітоў”

Hip-Hop Фэстываль „Active Action”
16 снежаня, Белдзяржцырк
Рэгістрацыя ўдзельнікаў у 15.00
Пачатак у 18.00
Інфа пра фэст: www.action.by

Вэрсія для друку