17.02.2010 - Яўген Валошын: атрымаў у вока і напісаў песьню http://music.fromby.net/

Лідэр HandmadE актуалізаваў лёзунг беларускіх адраджэнцаў пачатку 20-га стагодзьдзя «Загляне сонца ў наша ваконца» ў сваёй новай песеньцы «Постмадэрнізм». Песьня ў Яўгена Валошына нарадзілася, калі той атрымаў у вока і стаў прызэрам чэмпіянату Беларусі па тайбоксе сярод студэнтаў. Цікава, што ў песьні гурта HandmadE «Постмадэрнізм» няма ні слова пра гэты самы постмадэрнізм. «Яшчэ ў ліцэі БДУ я некалі быў моцна ўражаны гэтай зьявай у літаратуры, ды наогул модная гэта цяпер штука, — тлумачыць аўтар песьні Яўген Валошын. — Аднак там ёсьць такая мешаніна, перапляценьне розных згадак, алюзіі, намёкі… Таму й захацелася мне гэта назваць „Постамадэрнізмам“… Ды таго ж — ключавая фраза „Загляне сонца…“ — гэта адсыл да нашай гісторыі, нацыянальнай культуры»… Яўген прызнаецца, што прадстаўлены тут запіс — хутчэй «дэмка», над якой яшчэ будуць працаваць прафэсіяналы напярэдадні выхаду сынглу гурта. Гісторыя запісу песьні такая. HandmadE граў канцэрт у Вільні. Арганізатары ня мелі магчымасьці заплаціць, а прапанавалі «аддзячыць» запісамі песень. Усё запісалася літаральна за тры гадзіны, на адным подыху. Гэты варыянт песьні ўвайшоў у складанку «169 кілямэтраў», якая зьявілася літаральна нядаўна. «Бубнача з намі тады не было, таму ўключылі лупы (кампутарныя барабаны), — кажа Яўген Валошын. — А пасьля паслухалі — прыкольна выходзіць, вырашылі не прыбіраць. Гэта ж сьцёбная песьня!» Яўген напісаў тэкст песьні па дарозе зь Менску ў Бэрлін, дзе меў сольны выступ перад моладзьдзю. Настрой быў цудоўны. За некалькі дзён да гэтага музыка стаў прызэрам чэмпіянату Беларусі па тайбоксе сярод студэнтаў, ехаў зь фінгалам пад вокам. Не настрой — казка! Ды і песьня, зрэшты, такая выйшла :). HandmadE — Постмадэрнізм (словы — Яўген Валошын, музыка гурта). Зьмяшчаецца са згоды выканаўцы. Глеб Лабадзенка, спэцыяльна для ТГ

Музычная прастора Беларусі © 2003-2007 Пры выкарыстаньні матэрэялаў спасылка на www.mpby.com абавязкова. Па ўсіх пытаннях пісаць на e-mail: